Hohä Hehä - aus meinem Buch Zimmer zwää mit Absicht

De Jürg het tüüf iigschnuufet ond debii probiert, nüd of de ekelhaft Too vom Ultraschallzaareiniger z lose. Er söll äfach locker bliibe, het em sin Bürokolleg, de Guido, mit me Grinse gsäät gha. Eso e chlinni Zaaschtääbotzete sei doch kä Sach.

Kä Sach! Kä Aanig het de, het de Jürg tenkt ond aagfange die hellgrüene Schtrech a de Zimmertecki obe zele. Jedesmol, wenn er do of dem Folterschtuel glege n ischt ond d Frau Bläuler sini Zee dentalhygienisch traktiert het, het er aagfange zele. Ond jedesmol isch es noch de n erschte paar Schtrech vebii gse mit de Zellete, will er si schtatt uf d Tecki vom Behandligsruum wider of d Schtorete n i sim Muul inne konzentriert het.

Er hei Täsche, het em d Frau Bläuler bi sim vorletschte Bsuech dör de Mundschutz döre n erchläärt gha. Looses Zaafleisch. Drom mös si d Ablaagerige e chli wiiter obe sueche. Sie het s denn gsuecht ond au gfonde gha. Fascht im Hirni obe, isch em Jürg etz mit me Graue dör de Chopf gange.

D Frau Bläuler het s Ultraschallgräät of d Ziite gläät ond ääs vo erne Marterinschtrument i d Hand gno, ond de Jürg het s gwesst: "Etz goot wider d Suechi wiiter obe n aa." Er het blitzartig alls aagschpannt, wo n er het chöne n aaschpanne, het d Hend in Hoseschtoff iegrabe ond mit de Zeche Füüscht gmacht.

......